प्रवक्ते संजय लाखे पाटील यांचा शिवसेनेच्या ठाकरे गटात प्रवेश
– जालन्यात काँग्रेसला मोठा धक्का
जालना : आगामी लोकसभा निवडणुकीच्या तोंडावरच काँग्रेसला मोठा धक्का बसला आहे. जालन्यातील काँग्रेसचे ज्येष्ठ नेते तथा प्रदेश प्रवक्ते संजय लाखे पाटील यांनी शुक्रवार रोजी शिवसेनेच्या ठाकरे गटात प्रवेश केला आहे. एकीकडे भाजपने रावसाहेब दानवे यांना जालना लोकसभा मतदारसंघातून सहाव्यांदा उमेदवारी जाहीर केली आहे. तर, महाविकास आघाडीकडून अद्यापही उमेदवाराचा शोध सुरू असतानाच लाखे यांच्या पक्ष प्रवेशाने काँग्रेसला धक्का बसला असला तरी शिवसेनेच्या गटात मात्र आनंद साजरा केला जात आहे.
खासदार आणि केंद्रीय मंत्री असलेले रावसाहेब दानवे यांना टक्कर देण्यासाठी महाविकास आघाडीतील सर्व पक्ष, तसेच काँग्रेस पक्ष उमेदवारांचा शोध घेत असतानाच काँग्रेस पक्षाचे एकनिष्ठ नेते तथा प्रदेश प्रवक्ते डॉ. संजय लाखे पाटील यांनी काँग्रेसची साथ सोडत शिवसेनेच्या ठाकरे गटाची मशाल हातात घेतली आहे. मुंबई येथील मातोश्रीवर पक्षप्रमुख उद्धव ठाकरे यांच्या हस्ते डॉ. संजय लाखे पाटील यांचा उद्धव ठाकरे गटात प्रवेश झाला आहे. डॉ. संजय लाखे पाटील हे मराठा क्रांती मोर्चार्चे राज्य समन्वयक आहेत. मराठा समाजाला कायदेशीर आरक्षण द्यावे, या मागणीसाठी ते सातत्याने लढा उभारत आहेत.
कॉग्रेसच्या राजकीय वतुर्ळात खळबळ
लोकसभा निवडणुकीच्या तोंडावर डॉ. संजय लाखे पाटील यांनी काँग्रेस पक्षाची साथ सोडल्याने काँग्रेस पक्षात आणि राजकीय वतुर्ळात एकच खळबळ उडाली आहे.